COMPUTER LEH MIHRING RILRU – MAK HLE MAI !

Computer khawvelah kan cheng mek avangin heta tanga zir tur pawimawh tak kan neiin ka hria a, chu chu Computer leh mihring rilru tih thupui hmangin kan zir ho dawn a ni.

OPERATING SYSTEM – TUMNA.

Computer-in hna a thawh theih nan a mamawh hmasa ber chu Operating System hi a ni a. Chu chu DOS emaw WINDOWS emaw kan ti thin a ni.
Chutiang bawkin kan RILRU-in hna a thawh theih nana a mamawh hmasa ber chu TUMNA hi a ni. Operating System tel lovin Computer-in hna a thawk thei lo ang bawkin, keini pawhin TUMNA tel lovin eng hna mah kan thawk thei lo.

COMPUTER-IN CURRENT A MAMAWH – RINNA.

Computer chu a nun theih nan Current a ngai thin a. Chutiang bawkin TUMNA hlawhtling turin RINNA a ngai thin a ni. Rinna Current chu a suk (fluctuate) reng chuan Computer-in hna a thawk tha thei thin lo ang bawkin, kan RINNA a nghet lo chuan TUMNA a hlawhtling thei lo.

COMPUTER VIRUS – RINHLELHNA.

Computer-ah Virus a awm chuan Computer-in hna a thawk tha thei thin lova. Computer chu a buai thin a,FILE thenkhat te pawh a ei chhe thin a ni.
Chutiang bawkin kan RINNAAH RINHLEHNA a awm chuan, kan rinna chuan hna a thawk tha thei thin lova, kan rinna chu a buai thin a, kan RINNA FILE leh TUMNA FILE thenkhat te chu rinhlelhna chuan min ei chhiat sak thin a ni.

SOFTWARE – MIND (RILRU).

Computer tawngkamah chuan BRAIN (THLUAK) hi HARDWARE a ni a. MIND (RILRU) chu SOFTWARE hi a ni. Thluak chu mita hmuh theih mihring taksa peng pakhat a ni a. Rilru chu mita hmuh theih loh Electric current anga chak sawifiah hleih theih loh a ni. Computer-in tha taka hna a thawh theih nan chuan SOFTWARE tha neih a ngai a. Kan thluak pawhin hna tha a thawk theih nan chuan rilru tha leh rilru hrisel kan neih a ngai thin. Software Crack version pawhin original ang deuh thawhin hna thawk teuh theih mahse original erawh chu a tluk tak tak thei lo a ni. Tin, hetiang hi sorkar phal loh thil a ni a, man theih an ni. Mihring rilru lem (rilru crack) pumi pawhin hna tha tak tak a thawk teuh thei a. Rilru original erawh a tluk tak tak thei lo. A lem aiin a tak hi miin an duh zawk zel a, Pathian pawhin lemchan nun hi a duh loh a ni. Original Software hmanga hnathaw hi a nuam em em a, mi zawng zawngin an duh ber a ni. Chutiang bawkin original rilru pumi chu mi zawng zawng ngainat a hlawh a, a bula awm nuam an ti thin. Original Software hi Computer tan a tha angin rilru hrisel leh rilru dik put hi kan thluak tan leh taksa tan a tha em em a ni. Kan thluakin hna tha a thawh theih nan leh kan hrisel theih nan rilru tha, rilru dik leh rilru hrisel i pu zel ang u.

ANTIVIRUS - PATHIAN THU.

Computer-in buai miah lovin hna a thawh theih nan leh pawn lam atanga Virus a luh loh nan ANTIVIRUS kan dah thin a ni. Chu Antivirus chuan pawn lam atangin Virus lo lut tur a veng thin a. Computer-a Virus a awm te kan CLEAN thin a, kan UPDATE fo thin bawk a ni.
Chutiang bawkin kan rilruin tha takin hna a thawh theih nan kan rilruah Pathian thu hi dah tlat ila, chu chaun pawn lam atanga thlemna leh rinhlelhna lo lut tur chu a veng ang a. Pathian thu hmang chuan mahni in-Clean fo ila, Pathian thu chu kan nunah i Update fo ang u. Chuti chuan kan lo hrisel ang a, kan hrisel chuan kan dam rei ang.

Conclusion.

Khawvel a lo changkang chho zel rualin mihringte pawh kan lo changkang chho zel a. Technology pawh a sang chho zel bawk a. In tin deuh thawa kan lo neih Computer hi tunlai khawvelah hre lo tumah kan awm tawh awm love. Computer hian kan mihring nihna leh mihring rilru put hmang a lo sawifiah tha hle mai. Mihring thluak pawh hi Computer ang a ni a. Computer leh mihring rilru hi a lo khaikhin thei reng mai a lo nia. Kan sawi lan loh pawh zirtur tam tak kan la nei thei awm e. Computer leh mihring rilru tih kan zir tak atang hian mahni infuih thar zel ang u.

Read More: DEPRESSION AWMZIA