FANAU ENKAWL - FATE ENKAWLNA KAWNGA KAN ZAWM TÛR ṬHENKHAT TE.

Fanau enkawl–Fate enkawlna kawnga kan zawm tur thenkhat te

Fanau enkawl hi thil harsa tak mai a ni a, engti ang tak pawhin zir mah ila, zir zawh leh thiam tak tak hi a awm thei lova. Fate enkawlna kawngah hian tumah hi kan perfect thei lo. A pass theih tak tak lo a ni. Parenting degree thiam tak pawh nei mah ila, a taka hman hi thil harsa tak mai a ni a. Theory leh practical hi a inang lo em em a ni. Tu Nu leh Pa te mah hian fanau enkawl ka thiam kan ti ngai lo. Tin, kan chhungkuain kan fate enkawl dan ṭha nia kan hriat kha, midang chhungkuaah chuan a ṭha kher lo thei a, a practicable lo thei a ni. Chuvangin a ṭha ber hi a awm thei lova, kan fate tana a ṭha ber kha a ṭha ber chu a ni mai. Mahse, a tlangpuia kan hriat tlan atana ṭha nia ka hriat, fate enkawlna kawnga kan zawm tûr ṭhenkhat te, ka rawn tarlang a, hetiangin:

1. Naupangte hi sual sa leh fel sa-in tumah an piang lo. An tlakna leilung, chhungkua, culture, sakhua leh environment a zirin an ṭhanglian mai ṭhin.
2. Naupangte hi kan hau reng tûr a ni lova, awmze nei lova vin vak te pawh hi tih loh tûr a ni.
3. Khawlaiah te, ṭhiante zingah te, mi zingah te hauh loh tûr a ni, an zak ve ṭhin.
4. Hauh leh zilh an tulna laiah chuan mahni Inah, pawn lam mi hriat lovin hauh tûr a ni.
5. Thlah zalên lutuk loh tûr, Thufingte 29:15,17.
6. Vuak an tulnaah chuan vuak pawh hreh loh tûr. Mahse, chhan tling tak a ni tûr a ni, Thufingte 13:24;23:13-14. Theih hram chuan vuak hi pumpelh tûr a ni a, kan vua a nih chuan, a chhan chiang takin hrilh tûr a ni.
7. Che lova awm thei lo an nih avângin khap reng loh tûr a ni. An chetna tûr remchang kan ngaihtuah sak ṭhin tûr a ni a. An chetna kha hman ṭangkai tum tûr a ni. An tih theih zâwng hna te pawh thawhtir ṭhin tûr a ni. Chhûngkaw chhehchhawla hman te hi a ṭha a nia.
8. An thil tisualah pawnga takin hauh nghal ringawt loh tûr. Thil tisual thei an ni tih hriat a ṭha. Keini Nu leh Pate pawhin kan tisual ṭhin tho kha maw.
9. Kan fate hi kan chawimawi fo tûr, lawmthu hril fo tûr a ni, Nu leh Pate kan diklo naah ngaihdam dil hreh loh tûr a ni.
10. Naupang thamna pek loh tûr.
11. Thilpek tiam zung zung loh tûr. Kan lo tiam tawh a nih chuan, chu chu tih sak ngei ngei tûr a ni. Kan tih theih loh chu tiam loh tûr a ni.
12. Zinna aṭangin thil hawn sak reng pawh a ṭul vek kher lo.
13. Mi fate nen tehkhin loh tûr.
14. Eng nge maw thillah an ṭhiante dem ngawt loh tûr.
15. Fate kan hlauh avângin pawisa te thuhruk loh tûr, zirtir zâwk tûr a ni.
16. Chhungkua inkawmkhawm fo tûr a ni.
17. Nu leh Pate, kan NUN a pawimawh, Pathian ringtu kan nihna lantir fo tut a ni.
18. Nu leh Pate, kan hna (duty)-ah kan rinawm tûr a ni. Entirnan: Nitin kan hna thawh ṭhin, kan duty-ah kan tlai fo tûr a ni lova, kan hnaah kan rinawm tûr a ni.
19. Fate hriatah chhungkua inhauh loh tûr a ni.
20. Nitin chhûng Inkhawm kan nei ṭhin tûr a ni.
21. Fate, Nuin emaw, Pain emaw, zilh hau laiin chhan loh tûr a ni. Kan lo ti diklo deuh a nih pawhin fate hriatah chhan miah loh tûr a ni, A ṭul a nih chuan an hriat lovin remchan hunah sawi mai tûr a ni.
22. Kan fate hian kan awmna hmun Address chiang tak an hre tur a ni a. Entirnan: Kan awm mekna veng, khua te leh kan zinna hmunah Address te pawh chiang takin kan hrilh ṭhin tûr a ni.
23. Chhûngkaw hming pum dik tak leh Address an hre vek tur a ni a. Phone number te pawh vawn tirtu a ni. Nu leh Pate emaw chhungkaw zinga Phone number pakhat emaw pahnih emaw tal vawn tir tûr a ni, An sawi theih tûr a ni.
24. Fate zingah duat bik neih loh tûr. Ngaihsak bik leh duat bik anga lan chang a awm thei a, fimkhur tûr a ni.
25. Kan fate, naupang leh naupang inhauhnaah Nu leh Pate inrawlh loh tûr. Mi fate nen an intibuaiin mahni fate bik chhan loh tûr.
26. Mi Inah awm dân tur te, mi Ina kan lennah awm dân tur te leh Biak Ina awm dân tûr zirtir/hrilh fo tûr a ni.
27. School-a an dinhmun chiang tak kan hre tûr a ni.
28. Zirlai avângin fate vau loh tûr a ni. Entirnan: I fail vaih chuan…. School-ah zirtirtu ten hau thei a, Inah Nu leh Pa ten kan hauh leh fo chuan, an Nun a hreawm lutuk thei a, fimkhur tur a ni.
29. Ziralaiah emaw, thil dangah emaw, fate chak lohna kan hriat sak tur a ni a, kan ṭanpui tûr a ni.
30. Kan fate kalna School zirtirtu te fel lohna, fate hriatah sawi miah loh tûr a ni. A ṭul chuan fate hriat lovin zirtirtu te chu va biak mai tûr a ni.
31. Kan fate kalna School zirtirtu te leh Nu leh Pate inpawhna a ṭha tûr a ni.
32. Nu leh Pate leh Fate kan inkawm ngeih ṭûr a ni. Kan fate tân ṭhian ṭha ber nih kan tum tûr a ni.
33. Fate thuhruk pawh min hrilh ngam khawpin kan inkawm ngeih tûr a ni.
34. Kan fate hian mahni inchhûng hi nuam an ti ber tûr a ni.
35. Nu leh Pate hi fate Role Model kan ni tûr a ni.

Tlangkawmna:

Kan fate hi Pathian laka kan rochan leh a lawman min pek a ni a. Vanram thlenga kan RO chhawm theih tûr awm chhun an ni a. Pathian rawn chunga Pathian duh dâna kan fate duat leh hmangaih takin kan enkawl tûr a ni.